პრეზიდენტი დღეს ზესტაფონში საქკაბელის ქარხანაში იმყოფებოდა. მიხეილ სააკაშვილმა 50 წლის წინ აშენებული საამქრო დაათვალიერა, რომელიც ცოტა ხნის გარემონტდა და აღდგა. ქარხანა 30-ზე მეტი სახეობის კაბელსა და ელექტროსადენს ამუშავებს. საწარმო კომპანია ენერგოპროს ერთ-ერთი მთავარი მიმწოდებელია. მიხეილ სააკაშვილი ქარხნის თანამშრომლებს გაესაუბრა და მათი მუშაობის პირობებს გაეცნო. (11.04.08 15:23) www.rustavi2.com.ge
ზესტაფონში ქრისტიან-დემოკრატიული მოძრაობის რაიონული ორგანიზაცია დაფუძნდა. იმერეთში რიგით მესამე ოფისის გახსნას პარტიის ყველა ლიდერი დაესწრო. გიორგი თარგამაძის განცხადებით, იმერეთში მათ სერიოზული დასაყრდენი ჰყავთ. საღამოს ქრისტიან-დემოკრატები სამტრედიაში მიემგზავრებიან, სადაც ანალოგიურ ოფისს დააფუძნებენ. 12.03.08 16:23 www.rustavi2.com.ge
ზესტაფონში, სააქციო საზოგადოება 'ფეროშენადნობთა ქარხნის' წინ საპენსიო ასაკის მუშებმა დღეს საპროტესტო აქცია გამართეს. აქციის მონაწილეთა განცხადებით, მიმდინარე თვის პირველი რიცხვიდან საპენსიო ასაკის პირებს საწარმოს მეპატრონეებმა ხელშეკრულება აღარ გაუგრძელეს.
ფეროშენადნობთა ქარხანას ბრიტანულ-უკრაინული კომპანია 'ჯორჯიანმარგანეცი' ფლობს. აქციის მონაწილეები აღნიშნულ კომპანიას საწარმოს მიზანმიმართულ გაკოტრებაშიც ადანაშაულებენ. მათი განცხადებით, დაიკლო წარმოების მოცულობამ, გაუქმდა სოციალური შემწეობები, მუშათა სასადილოები და შემცირდა საშვებულებო დღეები. 04.02.08 14:20 www.rustavi2.com.ge
საქართველოს ლეიბორისტთა პარტიის წევრების განცხადებით, ზესტაფონში უცნობმა პირმა მათი პარტიის საპრეზიდენტო კანდიდატის შალვა ნათელაშვილის შტაბის შენობას ხელყუმბარა ესროლა.
ვრცელდება ინფორმაცია, რომ ინციდენტი გვიან ღამით მოხდა. პარტიის ოფისში იმყოფებოდნენ შტაბის წევრები, როდესაც უცნობმა მანქანამ ჩაიარა, საიდანაც ხელყუმბარა ისროლეს; აფეთქების შედეგად ჩამსხვრეულია პირველი და მეორე სართულის მინები.
ოფიციალური მონაცემებით, ფაქტზე აღძრულია სისხლის სამართლის საქმე. 04.01.08 10:04 www.rustavi2.com.ge
ერთიანი ნაციონალური მოძრაობის პრეზიდენტობის კანდიდატი მიხეილ სააკაშვილი წინასაარჩევნო შეხვედრებს განაგრძობს და მან დღეს შეხვედრები თერჯოლასა და ზესტაფონში გამართა.
სააკაშვილმა ამომრჩევლებთან ქვეყნის განვითარების მომავლი 5 წლის გეგმებზე ისაუბრა.
მან დასძინა, რომ პრეზიდენტის სკამი არავის ეკუთვნის, 'თქვენ - ხალხმა უნდა გადაწყვიტოს, ვინ იქნება ქვეყნის მომავალი პრეზიდენტი'.
მოგვიანებით სააკაშვილი ზესტაფონის 'ფეროშენადნობთა ქარხანაში' საწარმოს მუშებს შეხვდა. დაათვალიერა ახლად გახსნილი სილიკომანგანუმის ნარჩენის წიდის გადამამუშავებელი ჰოლანდიური საწარმო. 15.12.07 17:17 www.rustavi2.com.ge
შემოსავლების სამსახურის საგამოძიებო დეპარტამენტის იმერეთის მთავარმა სამმართველომ ზესტაფონის ცენტრალური ავტოსადგურის შენობის სარდაფში უალკოჰოლო სასმელების ჩამომსხმელი შპს 'ირმას' დირექტორი გოჩა ჭიღლაშვილი დააკავა.
საწარმოდან ამოღებულია ფალსიფიცირებული ლიმონათის დიდი პარტია. გამოძიების ინფორმაციით, საწარმოში მძიმე ანტისანიტარიული მდგომარეობა იყო.
აღნიშნულ საქმესთან დაკავშირებით მიმდინარეობს გამოძიება სისხლის სამართლის კოდექსის 197-ე მუხლით, რომელიც სამ წლამდე თავისუფლების აღკვეთას ითვალისწინებს. 05.10.07 15:14 www.rustavi2.com.ge
ფინანსურმა პოლიციამ ზესტაფონის რაიონის სოფელ ქვედა საქარის თემის ყოფილი საკრებულოს თავმჯდომარე დააკავა. ბაადურ ფერაძეს ბრალად ედება სამსახურებრივი უფლებამოსილების ბოროტად გამოყენება და სახელმწიფო ქონების გაფლანგვა.
